#ЕвангелиеДня Гóре вáмъ, кни́жницы и фарисéе, лицемѣ́ри, я́ко затворя́ете цáрствiе небéсное предъ человѣ́ки: вы́ бо не вхóдите, ни входя́щихъ оставля́ете вни́ти. Гóре вáмъ, кни́жницы и фарисéе, лицемѣ́ри, я́ко снѣдáете дóмы вдови́цъ, и винóю далéче моли́твы творя́ще: сегó рáди ли́шшее прiи́мете осуждéнiе. Гóре вáмъ, кни́жницы и фарисéе, лицемѣ́ри, я́ко прехóдите мóре и сýшу, сотвори́ти еди́наго пришéлца: и егдá бýдетъ, творитé егó сы́на геéнны сугýбѣйша вáсъ. Гóре вáмъ, вожди́ слѣпíи, глагóлющiи: и́же áще кленéтся цéрковiю, ничесóже éсть: а и́же кленéтся злáтомъ церкóвнымъ, дóлженъ éсть. Бýи и слѣпíи, чтó бо бóлѣе éсть, злáто ли, или́ цéрковь, святя́щая злáто? И: и́же áще кленéтся олтарéмъ, ничесóже éсть: а и́же кленéтся дáромъ, и́же верхý егó, дóлженъ éсть. Бýи и слѣпíи, чтó бо бóлѣе, дáръ ли, или́ олтáрь, святя́й дáръ? И́же ýбо кленéтся олтарéмъ, кленéтся и́мъ и сýщимъ верхý егó: и и́же кленéтся цéрковiю, кленéтся éю и живýщимъ въ нéй: и клены́йся небесéмъ кленéтся престóломъ Бóжiимъ и сѣдя́щимъ на нéмъ.
- 3